Read in English

 Rydym wrthi’n paratoi ar gyfer cyfnod adeiladu’r prosiect, gyda’r ymchwiliadau safle ar y môr ar gyfer ardal yr arae a llwybr y ceblau alltraeth bron â’u cwblhau. Ar y tir, mae cam olaf yr ymchwiliadau archaeolegol ar safle’r is-orsaf ar waith ac mae disgwyl i’r gwaith o adeiladu ffosydd prawf ddechrau ar ein llwybr ceblau yn ddiweddarach yn yr haf.

Ochr yn ochr â hyn, rydym yn parhau i gynorthwyo busnesau yn y rhanbarth i wneud cais i weithio ar brosiect Awel y Môr, gan gynnal sesiwn friffio yn y Gynhadledd Fyd-eang Ynni Gwynt Alltraeth a gynhaliwyd ym Manceinion, ochr yn ochr â Llywodraeth Cymru a chlwstwr diwydiant rhanbarthol y Gynghrair Ynni Alltraeth.

Yn olaf, os oes gennych unrhyw gwestiynau am ein gwaith, mae croeso ichi gysylltu â’r prosiect drwy wefan Awel y Môr: www.awelymor.cymru

Ymchwiliadau archaeolegol blaenorol ar safle’r is-orsaf ar y tir

Mae ymchwiliadau archaeolegol yn mynd rhagddynt ar safle’r is-orsaf ar y tir, ac mae gwaith tebyg hefyd ar fin dechrau ar hyd y llwybr ceblau. Mae’r ddau ddarn hyn o waith yn cael eu cynnal gan ddau gwmni o Gymru.

Mae’r ymchwiliadau ar safle’r is-orsaf yn cael eu cynnal gan Archaeology Wales, sydd wedi’i leoli ym Mhontypridd, tra mae’r gwaith ar y llwybr ceblau yn nwylo cangen fasnachol Heneb – Ymddiriedolaeth Archaeoleg Cymru. Mae gan Heneb swyddfeydd ym Mangor.

Bydd Archaeology Wales yn ymchwilio i ardaloedd o safle’r is-orsaf a bennwyd ar gyfer astudiaeth bellach yn ystod gwaith i gloddio ffosydd prawf yn 2024, ardaloedd a allai gynnwys gweddillion o’r Oes Rufeinig neu’r Oes Haearn.
Fel rhan o’r ymchwiliadau, bydd ardaloedd o bridd ar rannau o’r safle’n cael eu symud er mwyn i archaeolegwyr allu cynnal ymchwiliadau â llaw. Bydd unrhyw ddarganfyddiadau perthnasol yn cael eu symud o’r safle i’w hastudio ymhellach a bydd y safle’n cael ei adfer ar ôl cwblhau’r gwaith. 

Fel rhan o’r gwaith hwn, gosodwyd goleuadau traffig dros dro ar ran o Ffordd Glascoed, i’r gorllewin o Barc Busnes Llanelwy, i sicrhau bod contractwyr yn ddiogel pan fyddant yn mynd i’r safle ac ohono.

Dywedodd Siân Thomas, Swyddog Prosiect yn Archaeology Wales: “Rydym ni’n falch iawn o fod yn gweithio ar gynllun ynni adnewyddadwy mor bwysig i Gymru. Mae Archaeology Wales yn cyflogi tua 16 o bobl, ac mae cynllun fel hwn sy’n cael ei arwain gan ddatblygwr yn rhan fawr o’n gwaith.

“Yn ystod gwaith blaenorol, fe ddaethpwyd o hyd i nodweddion a oedd yn awgrymu ei bod yn debygol bod yno anheddiad o’r Oes Haearn i’r Oes Frythonig-Rufeinig, ac mae’r gwaith hwn yn gyfle pwysig i ychwanegu at yr hyn rydym ni’n ei ddeall am weithgarwch cynhanesyddol a Brythonig-Rufeinig yn Nyffryn Clwyd, ardal a chanddi dirwedd archaeolegol gyfoethog, ond un nad yw ond wedi’i harchwilio’n rhannol.” 

Bydd Heneb yn ymchwilio i leoliadau amrywiol ar hyd y llwybr ceblau 12km o hyd ar y tir, gan gloddio tua 30 o ffosydd prawf yr haf hwn. Cafodd y lleoliadau hyn eu nodi fel rhai a allai gynnwys archaeoleg wedi’i chladdu yn sgil arolygon geoffisegol a gynhaliwyd yn gynharach yn natblygiad y prosiect. 

Mae disgwyl i’r gwaith hwn ddod i ben ym mis Hydref cyn ailgychwyn y gwanwyn nesaf, pan fydd ffosydd prawf pellach yn cael eu cloddio ar hyd y coridor ceblau.

Aelodau o gôr Ysgol Gymraeg Melin Gruffydd, Caerdydd, ochr yn ochr ag Eleri Davies o RWE

Gydag Eisteddfod yr Urdd yn cael ei chynnal ar Ynys Môn eleni, roedd tîm Awel y Môr wrth ei fodd o gefnogi’r digwyddiad, gan noddi sgriniau mawr o amgylch y maes.

Gofynnwyd hefyd i Eleri Davies, Pennaeth Datblygiadau Ynni Gwynt ar y Tir RWE ar gyfer Cymru a Lloegr, gyflwyno gwobr, gan roi tlws i Ysgol Gymraeg Melin Gruffydd am ennill cystadleuaeth y parti unsain.

Dywedodd Eleri Davies: “Fel cwmni â phresenoldeb mor fawr yma yng Nghymru, rydym ni’n falch iawn o allu cefnogi digwyddiadau a sefydliadau diwylliannol pwysig, fel yr Urdd.

“Rwy’n gwybod bod gan lawer o aelodau staff sy’n gweithio ar ein safleoedd ledled Cymru atgofion melys o gymryd rhan mewn cystadlaethau, fel llefaru, canu a dawnsio gwerin, a bod gan eraill blant sy’n cystadlu bob blwyddyn hefyd.”

Jordan O’Neill, Rheolwr Datblygu Cadwyn Gyflenwi Awel y Môr, yn rhoi cyflwyniad yn y Gynhadledd Fyd-eang Ynni Gwynt Alltraeth a gynhaliwyd eleni ym Manceinion

Bu Jordan O’Neill, Rheolwr Datblygu’r Gadwyn Gyflenwi, yn rhannu’r diweddaraf am y prosiect, gan gynnwys gwybodaeth am hynt y prosiect hyd yma a’n camau nesaf.

Ymunodd Ffion Davies o’r Gynghrair Ynni Alltraeth, clwstwr y diwydiant sy’n cwmpasu gogledd Cymru a gogledd-orllewin Lloegr, a Cheryl Whittaker, Rheolwr Ymgysylltu Rhanbarthol Llywodraeth Cymru, ag ef.

Y digwyddiad dau ddiwrnod o hyd hwn yw un o ddigwyddiadau blynyddol mwyaf y byd ar gyfer y diwydiant ynni adnewyddadwy, gyda miloedd o bobl yn dod i’r gynhadledd o bob rhan o’r byd.

Y tîm yn trafod y prosiect gydag Adam Price AS, y Gweinidog Cabinet dros Fenter, Cysylltedd ac Ynni

Yn ogystal â chwrdd â chwmnïau posibl yn y gadwyn gyflenwi a chydweithwyr proffesiynol yn y diwydiant, cyfarfu’r tîm ag Adam Price, y Gweinidog Cabinet dros Fenter, Cysylltedd ac Ynni, a chynrychiolwyr Llywodraeth Cymru.

Roedd y tîm hefyd yn falch o groesawu grŵp o ddisgyblion o Ysgol Maes Garmon yn Sir y Fflint i stondin RWE i siarad am ynni gwynt ar y môr yn eu hardal nhw.

Bu Ysgol Maes Garmon o’r Wyddgrug yn Sir y Fflint hefyd yn ymweld â’r stondin i ddod i wybod mwy am ynni gwynt ar y môr yng ngogledd Cymru

Dywedodd Jordan O’Neill: “Mae Awel y Môr, a’r sector ynni gwynt ar y môr ehangach, yn gyfle pwysig i wireddu twf economaidd, felly mae sicrhau bod busnesau yng ngogledd Cymru ac mewn ardaloedd cyfagos yn deall sut y gallai eu gwasanaethau nhw fod yn rhan o’r gadwyn gyflenwi yn hollbwysig.

“Mae Offeryn Llywio Cyflenwyr RWE yn darparu dull hunanwasanaeth sy’n cynorthwyo cyflenwyr i ddod o hyd i gyfleoedd gydag RWE sy’n gydnaws â’u sgiliau a’u galluoedd. Mae hefyd yn darparu eglurder o ran pa wasanaethau sy’n cael eu caffael yn uniongyrchol ac yn anuniongyrchol.

“Fodd bynnag, roedd croesawu disgyblion ysgol o ogledd Cymru i’r stondin yn uchafbwynt. Bwriedir i Awel y Môr fod yn weithredol am ran helaeth o ail hanner y ganrif, felly bydd disgyblion Ysgol Maes Garmon heddiw yn elwa’n uniongyrchol wrth iddyn nhw dyfu’n hŷn, p’un a fyddan nhw’n cael eu cyflogi yn y diwydiant ynni adnewyddadwy, neu’n defnyddio’r ynni i bweru eu cartrefi a’u gweithleoedd.”

Wrth i brosiect Awel y Môr agosáu at y cam adeiladu a’r cam gweithredu, bydd tîm y gadwyn gyflenwi’n parhau i gynorthwyo busnesau’r rhanbarth i lywio’u ffordd drwy’r pecynnau gwaith amrywiol sydd eu hangen drwy gydol oes fferm wynt ar y môr.

Yn ogystal ag offer ar-lein a chronfeydd data, bydd hyn hefyd yn cynnwys digwyddiadau gwybodaeth a fydd yn cael eu cynnal yng ngogledd Cymru yn ystod y misoedd nesaf.

Os hoffai eich busnes chi fod ymhlith y cyntaf i gael unrhyw wahoddiadau perthnasol, beth am ystyried ymuno â menter STEP RWE?